الضحك بمعنى الكلمة

-هادا واحد كيجري مورا التران، يطيح وينوض، يطيح وينوض

الناس كاملين اللي راكبين ف التران كيموتوا عليه بالضحك
ناض واحد طل عليه من الشرجم وقال ليه: وبركة أصاحبي، راه قتلتينا بالضحك
قال ليه هاداك الراجل: إيوا دابا تموتوا بالخلعة راه أنا الشيفور

 

سولو واحد المحشش : إيلا كان التدخين محرم، أش يكون الحشيش ؟؟
قال ليهوم : احتمال يكون ذو القعدة 

 

واحد تالف سول واحد خينا : خويا عافاك أشنو أسرع طريق توصلني لصبيطار؟
قال ليه : غمض عينيك وقطع الشانطي

واحد المكلخ شرى أيفون. شوية رجعو للمحل، وقال ليهم: ما حشمتوش؟ بعتوا ليا أيفون قديم
قالو ليه: باش عرفتيه قديم؟
قال ليهم: التفاحة اللي فيه معضوضة

 

شفار تزوج شفارة، ملي ولدو وليد لقاوه ساد ايديه، وملي حلوها لقاو الخاتم ديال القابلة

هادا واحد بغى يشري بيستاش وما عرفش سميتو
مشى عند مول الحانوت وقال ليه: عطيني كاوكاو اللي كيضحك

هادا واحد مشى لواحد العرس و بدا ياكل ياكل ياكل حتى بغات كرشو طرطق
قالوا ليه: أدير صبعك ف فمك باش ترد
قال ليهم: كون بقات بلاصة فين ندير صبعي كون كليت مازال بنانة

واحد مبوق كيتمشى حدا واحد الواد وهو يخرج ليه تمساح

وهو يقول: يآآآآآآآاه! لا كوست

هادا واحد مؤدب بزاف. مللي كيبغي يحل التلاجة كيدق هو اللول

 

جوج مشاو للمحطة د التران ولقاوه بدا كيتحرك. واحد لحقو نقز فيه وركب، ولاخور ميت بالضحك ما ركبش. مللي سولوه مالك؟ قال ليهم: هاداك المكلخ راه غير جا يوصلني

 

هادو جوج غاديين ف الغابة وهو يخرج ليهم سبع. ناض اللول ضرب السبع بحجرة كبيرة وهرب كيجري. شوية وهو يتلفت وراه وبان ليه صاحبو كاع ما كيجريش. قال ليه: وا مالك أصاحبي ماكتجريش؟
جاوبو صاحبو: وعلاش نجري؟ مالي أنا اللي ضربتو؟